Müstəqil siyasət yürüdən Azərbaycan

Rusiyada Avrasiya İqtisadi İttifaqı ölkələrinin liderlərinin görüşü başlayıb. Tədbir çərçivəsində Rusiyanın iştirakı ilə Ermənistanla Azərbaycan arasında növbəti görüş keçiriləcək.

Bu, Azərbaycanın tədbirə qatılmasını şərtləndirən əsas səbəblərdən biridir. Buna baxmayaraq, Rusiyanın dəstəyi ilə keçiriləcək üçtərəfli görüşdə hər hansı sənədin qəbul edilməsi gözlənilmir. Çünki Ermənistan yenə də sülh müqaviləsində maraqlı olmadığını göstərdi.

Politoloq İlyas Hüseynovun sözlərinə görə, Ermənistan mövqelərin yaxınlaşmasına dair çağırışlara məhəl qoymadan destruktiv və pozucu niyyətini yenidən ortaya qoyur.

Azərbaycan ikitərəfli formatda, Ermənistan istisna olmaqla, Avrasiya İqtisadi Birliyinə üzv ölkələrlə sıx əlaqələrə malikdir. Azərbaycanın həmin ölkələrlə 5 milyard dollara yaxın ticarət dövriyyəsi var. Azərbaycan dayanıqlı iqtisadiyyata malik, özünü təmin edən ölkədir və xaricdən hər hansı dəstəyə ehtiyacı yoxdur. Bu bizə müstəqil xarici siyasət yürütməyə imkan verir.

Azərbaycan Şərq-Qərb, Şimal-Cənub nəqliyyat dəhlizlərinin fəal iştirakçısıdır. Bu baxımdan, Zəngəzur dəhlizi region ölkələrinin tranzit potensialını yüksəldir və nəqliyyat sahəsində yeni imkanlar açır. Paşinyanın Zəngəzur dəhlizi ilə bağlı məsələyə cavab verməyə çalışarkən, uğursuzluğa düçar olması da, Azərbaycandan fərqli olaraq sülh və sabitlikdə maraqlı olmadığını göstərir.