Naxçıvanda “əməliyyat” | Azərbaycan və Türkiyə hərbçiləri döyüş hazırlığında

Naxçıvanda "Sarsılmaz Qardaşlıq-2025" və "Mustafa Kamal Atatürk-2025" təlimləri keçiriləcək.

Bu barədə məlumatı Azərbaycan Müdafiə Nazirliyi yayıb.

Belə ki, hərbi əməkdaşlıq haqqında sazişə uyğun olaraq birgə taktiki təlimlərə hazırlıq məqsədilə Azərbaycan-Türkiyə dövlət bayraqlarının dəyişmə mərasimi keçirilib.

Əlahiddə Ümumqoşun Ordunun Qərargahından hərəkətə başlayan bayraq taqımı Sədərək sərhəd-keçid məntəqəsinə ‒ Araz çayı üzərindəki "Ümid" körpüsünə doğru yürüşə başlayıb.

Eyni zamanda Türkiyənin bayraq taqımı da Ağrı vilayətinin Doğubəyazit rayonundan mərasimin keçiriləcəyi ünvana doğru yürüş edib.

"Ümid" körpüsündə Azərbaycan Respublikasının Dövlət Himni və Türkiyə Respublikasının İstiqlal Marşı ifa edildikdən sonra bayraqların dəyişmə mərasimi olub. Sonra təlimə cəlb edilən bölmələr və hərbi texnika sərhəd-keçid məntəqəsindən Naxçıvana yola düşüb.

Təlimin planına əsasən, tank, mexanikləşdirilmiş və komando bölmələri artilleriya, hava hücumundan müdafiə və aviasiya bölmələrinin dəstəyi ilə müxtəlif təlim-döyüş tapşırıqlarını yerinə yetirəcək.