Netanyahu məğlub olacaq? - Dünyaya səs salan hadisələrin pərdəarxası məqamları - Baku TV

İsrail Knessetinə 2026-cı il oktyabrın 26-da keçirilməsi planlaşdırılan seçkilər ərəfəsində hakim “Likud” partiyasının hazırladığı plakat müzakirələrə səbəb olub.

Plakatda İranın Ali Rəhbəri Müctəba Xamenei, Nyu-York meri Zohran Mamdani, Türkiyə Prezidenti Rəcəb Tayyib Ərdoğan və “Hizbullah” lideri Naim Qasım birlikdə təsvir olunub. Plakatda “Netanyahunun uduzmasını istəyirlər. Onların qələbə qazanmasına imkan verməyin” mesajı yer alıb.

Politoloq Zaur İbrahimlinin sözlərinə görə, plakat İsrail seçki kampaniyasının əsas təbliğat vasitələrindən birinə çevrilib:

“Plakatda bir-biri ilə əlaqəsi olmayan şəxslərdir. Netanyahu bununla göstərmək istəyir ki, o, yalnız seçkilərə getmir, eyni zamanda İsrailin düşmənləri ilə mübarizə aparır”.

Ekspert bildirib ki, bu yanaşma İsrail cəmiyyətindəki siyasi qütbləşməni də nümayiş etdirir:

“Bu həm İsrail cəmiyyətindəki qütbləşməni göstərir, həm də seçkilərin nə qədər tarixi əhəmiyyət daşıdığını ortaya qoyur”.

Politoloq hesab edir ki, hazırkı dinamika davam edərsə, Netanyahu koalisiyasının seçkilərdə qalib gəlmək ehtimalı yüksək deyil:

“Xüsusi fövqəladə hadisələr baş verməsə, Netanyahu əleyhinə koalisiya qalib gələ bilər. Lakin seçki kampaniyasının qarşıdakı iki ayı ərzində həm ölkədaxili, həm də xarici proseslər nəticələri köklü şəkildə dəyişə bilər”.