Onların çirkin planları iflasa uğrayacaq | Politoloq

Fevralın 3-də Fransa Milli Jandarmının briqada generalı Uilyam De Meyer Avropa İttifaqının Ermənistandakı mülki missiyasının yerləşdiyi əraziyə baş çəkib.

General Ermənistan-Azərbaycan sərhədindəki vəziyyəti müşahidə edib, ermənilər onu durumla bağlı məlumatlandırıblar.

Maraqlıdır ki, Uilyam De Meyerin səfərindən cəmi bir gün sonra Ermənistandan Azərbaycana keçmək istəyən Çexiya vətəndaşı saxlanılıb. Hətta Çexiya səfirliyi saxlanılan vətəndaşı barədə şərhdən imtina edib. Hadisələrin bu formada ardıcıllığı isə proseslərin Ermənistanın növbəti təxribatı olduğuna şübhə yeri qoymur.

Görünən odur ki, Fransa başda olmaqla bəzi ölkələr və beynəlxalq təşkilatlar Ermənistan vasitəsilə ölkəmizin suverenliyinə, eləcə də kövrək sülhün ilkin addımlarına xələl gətirmək üçün məkrli planlarını davam etdirirlər. Lakin Ermənistan da, havadarları da unudurlar ki, bu fəaliyyət Azərbaycana yox, böhrandan çıxmaq üçün Azərbaycan və Türkiyəyə ehtiyac duyan Ermənistanın özünə ziyandır.