Osakyan BMT-dəki uğursuzluqla bağlı paylaşım etdi

Ermənistanın keçmiş xarici işlər naziri Vardan Oskanyan BMT Təhlükəsizlik Şurasının Qarabağla bağlı iclasını məyusluq hesab edir.

Bu barədə o, öz “Facebook” səhifəsində yazıb.

“Cəmiyyətimizdə nikbinlik və ümid yaradan BMT Təhlükəsizlik Şurasının iclası məyusluqla başa çatıb. Heç bir qətnamə və ya bəyanat qəbul edilməyib və nə vaxtsa beynəlxalq hüquq normalarına uyğun olaraq Azərbaycanı Laçın dəhlizini açmağa məcbur edəcək qətnamənin qəbul ediləcəyi şübhə doğurur”, – deyə V.Oskanyan qeyd edib.

Təhlükəsizlik Şurasının beş daimi üzvündən heç biri çıxışında Ermənistanın Qarabağı vaxtından əvvəl Azərbaycanın bir hissəsi kimi tanımasına xüsusi diqqət yetirməyib.

"Hazırkı danışıqlarda əsas vasitəçilərdən biri olan Avropa İttifaqının nümayəndəsi Dağlıq Qarabağ Muxtar Vilayətinin adını çəkdi ki, bu da, məncə, təsadüfi deyil”, – deyə V.Oskanyan bildirib.

V.Oskanyana görə, bunun gələcəkdə hüquqi nəticələri də ola bilər. Çünki keçmiş xarici işlər nazirinin sərsəm iddiasına görə, Qarabağ heç vaxt Azərbaycanın tərkib hissəsi olmayıb.