Overçukdan "Tramp marşrutu"na münasibət | Rusiyada kritik görüş keçiriləcək

“Gələn həftə Azərbaycan tərəfi ilə Cənubi Qafqazda nəqliyyat kommunikasiyalarının blokunun açılması məsələsini müzakirə edəcəyəm”.

Bunu Rusiya Baş nazirinin müavini Aleksey Overçuk jurnalistlərə açıqlamasında deyib.

Overçuk görüşün Rusiyada olacağını bildirib.

Onun sözlərinə görə, Azərbaycan, Ermənistan və Rusiya baş nazir müavinləri səviyyəsində fəaliyyət göstərən üçtərəfli işçi qrupu liderlərin imzaladığı bəyanatın 9-cu bəndinin icrası və dəmir yolu kommunikasiyalarının inkişafı üzrə iş aparır:

“Üçtərəfli işçi qrupu çərçivəsində müzakirə olunan məsələlərin həllində tərəflərin nə qədər irəlilədiyini bilməkdə maraqlıyıq. Bəzi nüanslar Rusiya Federasiyasının Cənubi Qafqazdakı maraqlarına, ilk növbədə, dəmir yolu kommunikasiyalarının inkişafı baxımından təsir göstərir. Ona görə də həmin nüansların tapılıb-tapılmadığını eşitməkdə çox maraqlı olacağıq”.

Overçuk əlavə edib ki, əgər bütün məsələlər yekunlaşdırılıbsa, layihələrin texniki-iqtisadi əsaslandırması hazırlanacaq və blokun açılması üzrə addımlar atılacaq:

“Amma yenə də bunun üçün əlbəttə ki, Ermənistan və Azərbaycanla əldə etdiyimiz və yekunlaşdırdığımız qarşılıqlı fəaliyyət çərçivəsində üçtərəfli səylər tələb olunacaq".

O həmçinin “Tramp marşrutu”na da münasibət bildirib: “Əgər Ermənistan bu marşrutu vacib hesab edirsə, Rusiya bu qərarı dəstəkləyir. Ermənistan bizim strateji müttəfiqimizdir”.