Paris sülh sazişinə əngəl törədir

Milli Məclis Fransa Senatının yanvarın 17-də Azərbaycan əleyhinə qəbul etdiyi qətnaməyə cavab olaraq Fransaya qarşı sanksiyaların tətbiq edilməsi, bu ölkə rəsmilərinin Azərbaycanda hər hansı aktivləri aşkarlandıqda dondurulması, Fransa ilə bütün iqtisadi əlaqələrin dayandırılması, “Total” da daxil olmaqla, bütün şirkətlərinin Azərbaycandan çıxarılmasına dair Hökumətə çağırış edib.

Bununla yanaşı, Xarici İşlər Nazirliyinə tapşırılıb ki, Kanaki, Maohi Nui və Korsikanın müstəqilliyinin tanınması istiqamətində addımlar atılsın. Beləliklə, son vaxtlar onsuz da gərginləşən Azərbaycan-Fransa münasibətlərinin üstündən tamamilə xətt çəkildi.

Prezident İlham Əliyev dəfələrlə Qarabağ sülh danışıqlarının müzakirə predmeti deyil desə də, Fransa artıq ikinci dəfədir ki, qətnamə qəbul edərək Azərbaycanın öz ərazi bütövlüyünü və suverenliyini bərpa etməsini işğal kimi qiymətləndirir. Halbuki bu ölkə dünyanın müxtəlif bölgələrində 50-dən çox dövlətin ərazisini işğal edərək sərvətlərini talayıb, əhalisini uzun illər əsarətdə saxlayıb, insanlıq əleyhinə cinayətlər törədib. Rəsmi Paris imza atdığı bu vəhşilikləri unutsa da, tarix heç vaxt Fransanın bəşəriyyətə necə qənim kəsildiyini unutmayacaq.