Paşinyan: Ermənistan Azərbaycanın ərazi bütövlüyünü hər zaman tanıyıb

“Ermənistan Azərbaycanın ərazi bütövlüyünü hər zaman tanıyıb, lakin heç də həmişə bəyan etməyib”.

Bunu Ermənistanın Baş naziri Nikol Paşinyan iyulun 25-də keçirdiyi mətbuat konfransında deyib.

“Dünyada elə bir ölkə yoxdur ki, Qarabağı Azərbaycanın bir hissəsi kimi tanımasın. Ermənistan Qarabağ əhalisinin taleyini həll edə bilməz. Gündəlikdə duran məsələlər və müzakirələrin məntiqi isə heç bir halda dəyişmir. Moskvada Azərbaycan, Rusiya və Ermənistan xarici işlər nazirləri arasında keçiriləcək üçtərəfli görüşdən gözləntilərə gəlincə, Bakı ilə mümkün sülh müqaviləsinin daha bir neçə maddəsinin razılaşdırılmasında irəliləyiş gözləyirik”, – deyə Baş nazir bildirib.

Nikol Paşinyan əlavə edib ki, imzalanacaq sülh müqaviləsi ilə bağlı hələ razılıq əldə edilməyib. Onun sözlərinə görə, saziş üzərində iş davam edir.