Paşinyan Fransada: Makronla gülərək etdikləri “müzakirə”

Ermənistanın Baş naziri Nikol Paşinyan və Fransa Prezidenti Emmanuel Makron Yelisey Sarayında görüşüblər.

Ermənistan Nazirlər Kabinetinin yaydığı məlumata görə, görüşdə Ermənistan və Azərbaycan arasında münasibətlərin tənzimlənməsi məsələsi və mövcud problemlərin həllində beynəlxalq ictimaiyyətin dəstəyi müzakirə edilib.

Paşinyan hökumətinin Ermənistan - Fransa əməkdaşlığının inkişafında maraqlı olduğunu vurğulayıb. Tərəflər bu istiqamətdə fəaliyyətlərini ardıcıl şəkildə davam etdirməyə hazır olduqlarını bildiriblər.

Eyni zamanda onlar regionda sülh və sabitlik, eləcə də rəsmi İrəvanla Avropa İttifaqı arasında əməkdaşlığa dair fikir mübadiləsi də aparıblar. Emmanuel Makron Fransanın Ermənistana gələcək inkişafında və mövcud problemlərin aradan qaldırılmasında yardımını əsirgəməyəcəyini bir daha vurğulayıb.

Qeyd edək ki, Nikol Paşinyan həyat yoldaşı Anna Akopyanla birgə Fransada səfərdədir.