Paşinyan saxta xəritələrini müdafiə etmək üçün yalan danışdı

Ermənistanın Baş naziri Nikol Paşinyan Azərbaycan əleyhinə gülünc yalanlar danışmaqda davam edir.

O, hökumətin iyulun 6-da keçirilən növbəti iclasında iddia edib ki, guya İrəvan işğaldan azad olunan ərazilərlə bağlı dəqiq mina xəritələrini Azərbaycana təqdim edib:

“Azərbaycan Ermənistan tərəfini ərazilərin minalanmasında ittiham edir. Halbuki Ermənistan ötən il Azərbaycanın nəzarətinə keçən bütün ərazilərdəki minalanmış sahələrin xəritələrini Bakıya təhvil verərək bu məsələni də həll etməyə hazır olduğunu nümayiş etdirib. Həmin xəritələrin köməyi ilə Azərbaycanda genişmiqyaslı minatəmizləmə işləri aparılır”.

Sərsəm iddialarını davam etdirən N.Paşinyanın sözlərinə görə, guya Bakı İrəvanla münasibətləri yaxşılaşdırmaq üçün heç bir addım atmır.

Qeyd edək ki, Ermənistan xəritələrin bir hissəsini Azərbaycana versə də, sənədlərin böyük qismi minalanmış ərazilərlə üst-üstə düşməyib. Elə buna görədir ki, Vətən müharibəsindən sonrakı dövrdə 300-dək azərbaycanlı mina qurbanı olub.

Xəritələrin uyğunsuzluğuna xarici işlər naziri Ceyhun Bayramov da açıqlamalarının birində toxunub. Bildirib ki, indiyə kimi Ermənistan tərəfindən təqdim olunan mina xəritələrinin dəqiqlik göstəricisi təxminən 25 faizdir.