Paşinyan separatçıların başçılarından danışmaq istəmir

Ermənistan rəhbərliyi Qarabağdan qovulan separatçıların keçmiş “başçılarının” Azərbaycanda həbsdə saxlanılması ilə demək olar ki, barışıb.

Bu barədə erməni mediası məlumat yayıb. Bildirilib ki, Baş nazir Nikol Paşinyan yanvarın 16-da Ermənistan parlamentinin “Hayastan” fraksiyasının deputatı Aqvan Vardanyanın Bakıda həbsdə saxlanılan separatçılarla bağlı sualına cavab verməkdən sadəcə imtina edib.

Parlamentin sədri Alen Simonyan isə müxalifət deputatına məsələ ilə bağlı hökumətə yazılı müraciət etməyi məsləhət görüb.

Media yazır ki, Ermənistan separatçıların azad olunmasına laqeyd yanaşır, çünki onlardan təhlükə görür. Qarabağ terrorçularının keçmiş “komandan müavini” Davit Manukyanın, “Hayastan” fraksiyasının deputatı olan qardaşı Qeqam Manukyanın da hökumətin hərəkətləri ilə bağlı susduğu bildirilib.

“Mənim namusum var” fraksiyasının deputatı Tiqran Abramyan da vurğulayıb ki, Ermənistan hakimiyyəti qondarma rejimin geri qaytarılması üçün heç bir tədbirlər görmür və məsələni unutdurmağa çalışır. O, təəssüflə qeyd edib ki, müxalifətin alətləri yetərli deyil ki, məsələni beynəlxalq gündəmdə saxlasın.

Xatırladaq ki, qondarma rejimin tör-töküntüləri olan Bako Saakyan, Araik Arutyunyan, Levon Mnatsakanyan, Ruben Vardanyan və digərləri hazırda Bakıda həbsdədirlər. Separatçılıq və terrorçuluqda ittiham olunan bu şəxslər istintaq dövrü üçün 6 aylığa həbs olunub.