Paşinyan sülh müqaviləsindən danışdı | Müqavilə nə zaman imzalanacaq?

“Azərbaycanla danışıqlar onlayn formatda davam edir”.

Bunu Ermənistanın Baş naziri Nikol Paşinyan İctimai Televiziyaya müsahibəsində deyib. Bildirib ki, rəsmi İrəvan Azərbaycana öz təkliflərini verib və Bakıdan cavab gözləyir.

Baş nazir Ermənistanın “sülh müqaviləsi” ilə bağlı təkliflərə cavablarını niyə gecikdirdiyini də şərh edib:

“Bizi 2 ay cavab verməməkdə ittiham edirlər, bəs bunun səbəbi nə idi? Təkliflərimiz hazır idi, mütəmadi olaraq görüşlər planlaşdırılırdı, lakin daha sonra təxirə salındı. Hər görüş bu danışıqlar paketinin transferinin bir hissəsi idi. Amma indi də hesab edirəm ki, danışıqlar sülh müqaviləsinin mətninə uyğun olaraq davam edir. Üzbəüz olmasa da, onlayn olaraq danışıqlar aparılır”.

O əlavə edib ki, İrəvan bütün təmasları dəstəkləyir. Baş nazir yeni əlaqələrin yaradıla biləcəyini də istisna etməyib.