Paşinyan və kilsə arasında böyüyən münaqişə | Ermənistanı inkişafdan saxlamaq istəyənlər

“Bəziləri düşünürlər ki, katolikos postuna mənim namizədim var. Təəssüf ki, belə bir namizədim yoxdur. Amma katolikos necə olmalıdır, bax bunu təsvir edə bilərəm. Din pərdəsi arxasında gizlənən ikiüzlü yox, Tanrıya inanan, İsa Məsihin davamçısı olan şəxs kilsəyə rəhbərlik edə bilər. Bizim də cinayətkarın yerinə tanrıdan qorxan katolikosumuz olacaq”.

Bu sözlər Ermənistanın Baş naziri Nikol Paşinyanın “Facebook” paylaşımında qeyd edilib.

Paşinyan bildirib ki, Apostol kilsəsinin saxtakarlardan təmizlənməsi prosesində Türkiyə və Azərbaycan izi axtaranlar var. Onlar belə böhtanlarla cəmiyyətin qarşısında özlərini sudan quru çıxartmağa çalışırlar. Bu metoddan istifadə edənlər müqəddəs saydığımız kilsədə aparılan islahatları dalana dirəmək niyyətindədir.

Ermənistanın Baş nazirinin fikrincə, II Qareginlə əlbir olanlar Ermənistanı inkişafdan saxlamaq istəyir.

Diqqətçəkən digər məqam Paşinyanın II Qareginə doğulanda verildiyi adla xitab etməsidir. Paşinyan II Qareginə Ktriç Nersisyan deməklə onu katolikos saymadığını bir daha nümayiş etdirib. Həm də Qareginin Apostol Kilsəsindən çıxmasını tələb edib.