Paşinyandan açıqlama: Qarabağdan köçənlərə vətəndaşlığın verilməsi sürətləndiriləcək

Ermənistanın Baş naziri Nikol Paşinyan Qarabağı könüllü tərk edən, xüsusən də dövlət qurumlarında işləmək istəyən ermənilərə vətəndaşlıq verilməsi prosedurunu sürətləndirəcəyini vəd edib.

O, bu barədə onlayn mətbuat konfransında Qarabağdan İrəvana köçən, ixtisasca hüquqşünas olduğunu deyən qadının sualına cavab verərkən deyib.

Qadın Baş nazirə bildirib ki, İrəvanda işə düzəlmək istəyərkən əngəllərlə üzləşib. N.Paşinyan isə aidiyyəti qurumlara məsələni yerindəcə araşdırmağı tapşırıb:

“Araşdırmaların nəticəsində məlum oldu ki, sizin Ermənistan vətəndaşlığınız yoxdur və ona görə də işə qəbul edə bilməyiblər. Bildiyimiz qədəri ilə vətəndaşlıq almaq üçün müraciət etmisiniz, prosesin 90 gün və ya daha çox davam edə biləcəyini bildiriblər.

Bu halda vətəndaşlıq tələb etməyən müvəqqəti əmək müqaviləsi əsasında işləyə bilərsiniz. Eyni zamanda aidiyyəti qurumlara sizinlə yanaşı, minlərlə insanın vətəndaşlıq almaq prosesini sürətləndirməyi tapşırıram”.

Baş nazir qeyd edib ki, artıq minlərlə insan Ermənistan vətəndaşlığını almaq üçün müraciət edib.