Paşinyandan Azərbaycanla bağlı mühüm açıqlama

Ermənistanın Baş naziri Nikol Paşinyan Ermənistanda və onun hüdudlarından kənarda Azərbaycanla sülhü pozmaq istəyən qüvvələrin olduğunu bildirib.

“Bəli, sülh bərqərar olub. Lakin həm Ermənistanın özündə, həm də yaxın və uzaq xaricdə sülhü pozmağa, dayandırmağa çalışan qüvvələr var”, – deyə o qeyd edib.

N.Paşinyan avqustun 8-də Vaşinqtonda sülh müqaviləsinin paraflandığını xatırladıb.

“Bəyannamənin mətni imzalanıb. Bu, bir çoxlarının proqramına daxil deyildi. Belə qüvvələr həm Ermənistanda, həm də onun hüdudlarından kənarda var”, – deyə o əlavə edib.

“Ermənistan və Azərbaycan Vaşinqtonda bir-birlərinin ərazi bütövlüyünü, suverenliyini və sərhədlərinin toxunulmazlığını bir daha tanıyıb”, – deyən Baş nazir bu barədə parlamentdə çıxışı zamanı danışıb.

Onun sözlərinə görə, TRIPP layihəsi Ermənistan və ABŞ arasında ikitərəfli müzakirə mövzusudur.

“Bununla belə, obyektiv və subyektiv şəraitə görə, “Zəngəzur dəhlizi” ifadəsi Azərbaycanda o qədər məşhurlaşıb ki, Azərbaycan öz ərazisindən keçən istənilən infrastrukturu, o cümlədən “Tramp yolu”na qoşulmalı olan infrastrukturu da istənilən adla çağıra bilər”, – deyə N.Paşinyan vurğulayıb.