Paşinyandan tarixi etiraf: Qarabağ məsələsində sübutumuz yoxdur

“Ermənistan Qarabağ problemini erməni arqumentləri ilə həll edə bilməz və edə bilməyəcək”.

Bunu ölkənin Baş naziri Nikol Paşinyan Milli Assambleyada sualları cavablandırarkən deyib.

“Əslində sualınız artıq sizə cavab verir. Bu, istər müxalifət, istərsə də iqtidar olmağımızdan asılı olmayaraq, hamımız üçün ümumidir. Biz uzun illərdir ki, “erməni arqumenti” anlayışından istifadə etmişik və Qarabağ problemini bu konsepsiya çərçivəsində həll etməyə çalışmışıq. Təəssüf ki, Qarabağ probleminin erməni arqumentləri ilə həll edilə bilməyəcəyini dərk etməmişik. Qarabağ probleminin həlli ilə bağlı beynəlxalq arqumentlər və hüquqi qüvvəyə malik qərarlar var. Biz inanırdıq ki, erməni arqumentləri ilə onları zəiflədə, üstələyə, ləğv edə bilərik”, – deyə Paşinyan cavab verib.

“Problem ondadır ki, biz heç bir məsələni erməni arqumentləri ilə həll edə bilmərik, bu gün də heç bir məsələni həll edə bilmərik və edə bilməyəcəyik. Əgər bu mümkün olsaydı, müxalifət vaxtında məsələni həll edərdi və məsələ bu günə qədər gəlməzdi”, – deyə baş nazir bəyan edib.

Paşinyan həmçinin sualları cavablandırarkən bildirib ki, keçən il Praqada Azərbaycanın ərazi bütövlüyünün tanınması Ermənistanın öz ərazisini qorumaq üçün edilib: “Bu qərarı yanlış hesab edənlərin hamısı Ermənistanın suveren dövlət olmasına qarşıdır”.