Paşinyanın Zəngəzur dəhlizi hiyləsi

Prezident İlham Əliyev yerli kanallara sonuncu müsahibəsində Zəngəzur dəhlizinin açılması ilə bağlı Azərbaycanın şərtlərini açıq-aydın bəyan etdi.

Dövlət başçısının çıxışından bir neçə gün sonra Ermənistanın Baş naziri Nikol Paşinyan ənənəsinə sadiq qalaraq sərsəm açıqlamalarla gündəmə gəldi. İddia elədi ki, guya, üçtərəfli bəyannamədə Zəngəzur dəhlizi ilə bağlı heç bir bənd və Rusiyanın Ermənistanın hansısa ərazisində kommunikasiyaların təhlükəsizliyini təmin etməsi ilə bağlı heç yerdə qeyd yoxdur.

Paşinyanın bu fikirlərini şərh edən rusiyalı ekspertlər bildirirlər ki, Ermənistan Zəngəzur dəhlizinin açılması məsələsini 2020-ci il 10 noyabr tarixli üçtərəfli bəyatanla öhdəlik kimi üzərinə götürüb.

Rusiyalı politoloq Sergey Markov bildirib ki, Paşinyanın Zəngəzur dəhlizinin açılması öhdəliyindən yayınmaq cəhdləri Ermənistanın Azərbaycana qarşı davamlı düşmənçiliyinin bariz təzahürüdür:

“Bu yolla Ermənistan Rusiyaya qarşı da düşmənçiliyini ortaya qoyur. Çünki Soçi razılaşmasında qeyd olunub ki, nəqliyyat və dəmir yolu hərəkətinə nəzarət baxımından bu dəhlizin təhlükəsizlik funksiyalarını Rusiya sərhədçiləri və dəmir yolu şirkətləri yerinə yetirir. Biz təklif edirik ki, Azərbaycan vətəndaşları Ermənistana heç bir sənəd göstərmədən Zəngəzur dəhlizi ilə Azərbaycanın bir bölgəsindən digər bölgəsinə getsinlər. Ermənistan isə bu prosesi ləngitmək istəyir.

Belə görünür ki, dəhliz açılsa belə, onlar bunu ruslarla deyil, Fransa ilə həyata keçirəcəklər. Lakin mən düşünmürəm ki, Azərbaycan buna icazə verəcək. Fransa açıq şəkildə ermənipərəst mövqeyini ortaya qoyur. Ermənistan yenidən danışıqlar masasına oturmalı və Zəngəzur dəhlizinin açılması ilə bağlı hər iki tərəfi qane edən danışıqlar aparmalıdır”.

Ekspertlər onu da bildiriblər ki, Ermənistan artıq uduzub. O üzdən də götürüdükləri öhdəlikləri, o cümlədən də Zəngəzur dəhlizinin açılması məsələsini yerinə yetirməlidir. Bu dəhlizin açılması isə bütün region ölkələri üçün çox böyük iqtisadi əhəmiyyət daşıyacaq.