Planetimizin əhalisini qorumaq üçün... | COP29-la bağlı mətbuat konfransı keçirildi

BMT-nin İqlim Dəyişmələri üzrə Çərçivə Sazişinin Tərəfləri Konfrasının 29-cu sessiyası çərçivəsində “La Ruta del Clima”: İtki və zərər, təzminat və iqlim borcunun həlli: insan hüquqları öhdəliyi xeyriyyəçilik deyil mövzusunda mətbuat konfransı keçirilib.

Tədbirdə BMT-nin İqlim Dəyişikliyi üzrə xüsusi məruzəçisi Elisa Morqera qeyd edib ki, iqlim dəyişikliyi dünyanın aktual problemi olduğu kimi onunla mübarizə də aktuallıq təşkil etməlidir.

O bildirib ki, iqlim dəyişikliyi problemi ilə bütövlükdə planetimiz üzləşsə də, bundan ən çox zərər görən az inkişaf etmiş, inkişaf etməkdə olan və ya müstəmləkə şəraitində yaşayan dövlətlərdir. Bu problemi şərtləndirən bir nömrəli amil atmosferə həddindən artıq dərəcədə karbon qazının buraxılmasıdır.

“1990-cı illərdən ötən dövr ərzində bu həcm icazə verilən normadan dəfələrlə yüksək olub. Hesablamalarımız göstərir ki, planetimizin əhalisini iqlim dəyişikliyinin fəsadlarından qorumaq üçün trilyonlarla dollar vəsaitə ehtiyac var. COP29-un əsas məqsədi məhz bu vəsaitin təmin edilməsidir”, – deyə E.Morqera əlavə edib.

Bildirilib ki, iqlim dəyişikliyi ilə mübarizə bütövlükdə hər bir dövlətin vəzifəsi olmalıdır.

Qeyd edək ki, BMT-nin İqlim Dəyişikliyi üzrə Çərçivə Konvensiyasının Tərəfləri Konfransının 29-cu sessiyası sentyabrın 11-dən etibarən Azərbaycanda start götürür. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutub və onun katibliyi Bonnda yerləşir.