Prezident İlham Əliyev Yaxın Şərq Sülh Sammitində iştirak edir - CANLI

Azərbaycan Respublikasının Prezidenti İlham Əliyev 13 oktyabr 2025-ci il tarixində Misirin Şarm-əş-Şeyx şəhərində keçirilən Yaxın Şərq Sülh Sammitində iştirak edib. O, tədbirə Amerika Birləşmiş Ştatlarının Prezidenti Donald Trampın və Misir Prezidenti Əbdül Fəttah əs-Sisinin şəxsi dəvəti ilə qatılıb.

Sammitin əsas məqsədi Yaxın Şərqdə davamlı sülh və sabitliyin təmin edilməsi yollarını, habelə Qəzzada humanitar böhranın həlli və Fələstin-İsrail münaqişəsində atəşkəsin möhkəmləndirilməsi yollarını müzakirə etmək olub.

Prezident Əliyevin 20-dən çox ölkə liderinin iştirak etdiyi bu yüksək beynəlxalq forumda iştirakı, Azərbaycanın artan qlobal nüfuzunu və beynəlxalq sülh proseslərində etibarlı tərəfdaş kimi rolunu vurğulayıb.

Sammit zamanı ABŞ Prezidenti Donald Tramp Azərbaycan və Ermənistan liderlərinə (onlar da Sammitdə iştirak edirdilər) ictimai şəkildə müraciət edərək, onların sülhə doğru atdığı addımları yüksək qiymətləndirib və Vaşinqtondakı görüşdə Azərbaycan-Ermənistan münaqişəsinin uğurlu həllini qeyd edib. Tramp "32 il döyüşən" tərəflərin cəmi bir saat ərzində irəliləyiş əldə etdiyini bildirib.