Prezidentdən Ermənistanla danışıqlarla bağlı vacib açıqlama
“İndi bizim sülh sazişinin necə olması ilə bağlı ümumi anlayışımız var. Biz, sadəcə, təfərrüatları işləməliyik. Lakin əlbəttə, hər iki tərəfə vaxt lazımdır”.
Bu sözləri Prezident İlham Əliyev aprelin 23-də ADA Universitetində keçirilən “COP29 və Azərbaycan üçün Yaşıl Baxış” mövzusunda beynəlxalq forumda deyib.
Tərəflərin sülh sazişinin imzalanmasına heç vaxt olmadığı qədər yaxın olduqlarını qeyd edən dövlət başçısı işğal illərində hətta “Madrid Prinsipləri” üzrə razılığa gəlinmədiyini xatırladıb və bildirib ki, o zaman sülh sazişinin layihəsi belə yox idi. “İndi isə o, artıq mövcuddur”, – deyə dövlət başçısı əlavə edib.
Prezident İlham Əliyev çıxışında müxtəlif məsələlərə toxunub. O, Azərbaycan iqtisadiyyatının özünü təmin edən iqtisadiyyat oduğunu, hətta böhran vəziyyətində də dayanıqlı artım göstərdiyini vurğulayıb.
“Bizim xarici borcumuz çox aşağıdır, hətta hazırda ümumi daxili məhsulumuzun 8 faizindən də azdır”, – deyə dövlət başçısı bildirib.
COP29-un Azərbaycanda keçirilməsinin önəmindən danışan Prezident İlham Əliyev bildirib ki, bu, Azərbaycana olan beynəlxalq ictimaiyyətin böyük hörmət və dəstəyinin təzahürüdür:
“COP29 üç Cənubi Qafqaz ölkəsi arasında ən azı məsləhətləşmələri aparmaq üçün fürsət yaradacaq və gələcək əməkdaşlıq üçün yol açacaq. Hazırda unikal şans yaranıb. Biz bundan məhrum olmuşduq.
SSRİ süqut etdiyi zaman sülh şəraitində öz müstəqil həyatına başlamış Baltik dövlətlərindən fərqli olaraq, bizim bölgədə müharibələr gedirdi. İndi həmin səhifəni çevirmək şansı yaranıb. Biz bunu edirik.
Düşünürəm ki, COP29 əla fürsətdir”.