Prezidentin rezonans doğuran çıxışı | Mədəniyyət paytaxtından siyasi mesajlar

III Şuşa Qlobal Media Forumu Azərbaycanın informasiya siyasətində açıq dialoq, fikir mübadiləsi və qlobal əməkdaşlıq üçün vacib bir platformaya çevrilib.

Forumun builki mövzusu ‒ “Rəqəmsal Yollar: Süni İntellekt Dövründə Məlumat və Media Dayanıqlığı” media qarşısında duran çağırışlara birbaşa cavabdır.

Prezident İlham Əliyev tədbirdə çıxışı zamanı Azərbaycanın media siyasətinə verdiyi önəmi xüsusi vurğulayıb. Dövlət başçısı qeyd edib ki, ölkə mediası artıq milli maraqları qoruyan və informasiya müstəvisində hücum edən güclü bir alətə çevrilib. Dövlət başçısı Azərbaycanın informasiya sahəsindəki mövqeyini və prinsiplərini bir daha beynəlxalq auditoriyaya çatdırıb.

Ukrayna məsələsi ilə bağlı isə dövlət başçısının mövqeyi qətidir.

“Ukrayna heç vaxt işğalı qəbul etməməlidir, biz bunu etdik”, ‒ deyə ölkə rəhbəri bildirib.

Prezidentin bu çağırışı Ukrayna mediasında böyük rezonans doğurub.

Politoloq Rəşad Bayramovun sözlərinə görə, ölkə başçısının ukraynalı jurnalistin sualına verdiyi cavab özündə bir sıra mətləbləri ehtiva edir:

“Bir tərəfdən Ukraynanın ərazi bütövlüyü və suverenliyinə verilən dəstək indiyədək ayrı-ayrı platformalarda Azərbaycan tərəfinin ortaya qoyduğu mövqenin növbəti dəfə ifadəsi idi. Digər tərəfdən isə bu həm də Ukraynada baş verənlərin bir işğal olduğunun və işğalçının da kim olduğunun ortaya qoyulması idi.

Təbii ki, uzun illər ərzində əraziləri işğala məruz qalan, suverenliyi pozulmuş bir ölkə olaraq Ukraynanın düşdüyü vəziyyəti biz daha yaxşı qiymətləndirə bilirik. Ölkə başçısı da bu cür mövqe ifadə etməklə bir təcrübəni bölüşmüş oldu”.