Putindən Ermənistanın Qarabağla bağlı qərarına reaksiya

“Ermənistan rəhbərliyi faktiki olaraq Azərbaycanın Qarabağ üzərində suverenliyini tanıdı və Praqa bəyanatında bunu rəsmi şəkildə imzası ilə təsdiqlədi. Biz bunu artıq bilirik”.

Bunu Rusiya Prezidenti Vladimir Putin Vladivostokda keçirilən Şərq İqtisadiyyat Forumunun plenar iclasında bildirib.

“İndi mənə Prezident İ.Əliyev deyir ki, “siz axı bilirsiniz ki, Ermənistan Qarabağın Azərbaycan olduğunu qəbul edib və status məsələsi həll olunub. Ermənistan rəhbərliyi 1991-ci ilə qədər Azərbaycan SSR-i çərçivəsində Qarabağ da daxil olmaqla ərazilərin ölçülərini qeyd edib”. Bu baş verib və bu, bizim yox, hazırkı Ermənistan rəhbərliyinin qərarıdır. Bizə deyirlər ki, belə olduğu halda, əgər siz Qarabağ məsələsində nəsə etmək istəyirsinizsə, bizimlə ikitərəfli danışıqlar əsasında etməlisiniz. O zaman biz başqa nə deyə bilərik ki? Ermənistan özü Qarabağın Azərbaycan olduğunu qəbul edibsə, deyəcək söz yoxdur”, – V.Putin vurğulayıb.