Qarabağ ermənilərinin Yevlax görüşündən imtina səbəbi

Qarabağdakı separatçıların rəhbəri Araik Arutyunyan Yevlax görüşündən imtinanın səbəbi kimi Azərbaycana beynəlxalq təzyiqlərin artmasını göstərib.

Dolayısı ilə terrorçular özləri də etiraf ediblər ki, onlara revanşist meyillərini davam etdirmək üçün bir ümid işığı belə kifayətdir. Təbii ki, bölgədə yaranan yeni reallıqlar fonunda qanunsuz silahlı birləşmələrin və Ermənistan hakimiyyətinin sərgilədiyi bu mövqe həm sülh və sabitliyə xələl gətirir, həm də onların özünü daha acınacaqlı vəziyyətə sürükləyir.

Məsələ ilə bağlı politoloq Natiq Miri bildirib ki, separatçı quldur rejim müstəqil siyasi iradəyə malik bir qurum deyil:

“Buna görə də onların görüşlə bağlı hansısa müstəqil qərar qəbul etməsi doğru deyil. Ancaq bu, yeganə məsələ deyil. Separatçı rejim rəhbərliyi tənqid etsə də, bu gün ciddi şəkildə Ermənistandan asılı vəziyyətdədir. Çünki Ermənistan separatçı rejimi saxlamaq üçün illik 350 milyon dollardan artıq maliyyə vəsaiti ayırır. Ona görə də Ermənistanın siyasi iradəsi bu quldur rejim üçün çox önəmlidir. Əlavə olaraq Ermənistan bu gün müstəqil subyekt deyil. Ermənistanı, separatçı rejimi müəyyən hadisələrə təhrik edən başqa güc mərkəzləri var. Ona görə də anti-Azərbaycan prosesi başlatmaqla quldur rejimi bu görüşdən imtina etməyə vadar etdilər”.