Qarabağı Azərbaycan ərazisi kimi tanıdı, barəsində cinayət işi açıldı

Erməni bloger və aktivist İşxan Verdyan Prezident İlham Əliyevə müraciət edərək Azərbaycandan siyasi sığınacaq istəyib.

Hazırda İstanbulda yaşayan İ.Verdyan bu barədə teleqram kanalında paylaşım edib.

O bildirib ki, Qarabağı Azərbaycanın tərkib hissəsi kimi tanıdığına görə Ermənistanda barəsində cinayət işi başlanılıb.

Aktivist vurğulayıb ki, Ermənistan hökuməti ona ömürlük həbs cəzası vermək istəyir.

“Bildirmək istəyirəm ki, Ermənistana qayıtmağım həbsimə gətirib çıxaracaq, beynəlxalq axtarışa verilməyim isə Ermənistanda həbsxanadan başqa digər hər yerin qapılarını mənim üzümə bağlayır. Hörmətli cənab Prezident, mövcud reallıqları və vətəndaşlığım olan ölkəyə qayıtmağımın qeyri-mümkünlüyünü nəzərə alaraq, mənə Azərbaycanda siyasi sığınacaq verməyinizi xahiş edirəm”, – deyə İ.Verdyan vurğulayıb.