“Qarabağı tanımamaqla səhv etmişəm” | Paşinyan çıxışında nələri danışdı?

Ermənistanın Baş naziri Nikol Paşinyan Qarabağ nizamlanması ilə bağlı Azərbaycanla danışıqlara dair əsas sənədləri 2025-ci ilin sonunadək dərc etməyi vəd edib.

O bunu sabiq prezident Serj Sarkisyanın ittihamlarına cavab olaraq bildirib.

“Serj Sarkisyan yenidən danışıqlar sənədlərindən söhbət açıb. Narahat olma, mən artıq danışıqların tarixçəsi ilə bağlı bütün əsas sənədləri toplamışam, 2019-cu il də daxil olmaqla, indi onların surətini çıxarırıq və aralarına bir neçə rəsmi sənəd də əlavə edərək ilin sonunadək hamısını dərc edəcəyəm”, ‒ N.Paşinyan sosial şəbəkələrdə yazıb.

Onun fikrincə, əgər Ermənistan bu vaxtadək Qarabağı Azərbaycanın tərkib hissəsi kimi tanısaydı, 2020-ci ildə İkinci Qarabağ müharibəsindən qaçmaq olardı.

“İlk addım kimi Qarabağın Azərbaycanın bir hissəsi olduğunu tanımalı idik, başqa variant yox idi. Əgər biz düşünürüksə, 2018-19-cu illərdə bunu edə bilərdik, bəli, mən bunu etməməklə səhv etmişəm”, ‒ Nikol Paşinyan belə deyib.