Qərbi Azərbaycan İcması bəyanat yaydı - Baku TV

“Qərbi Azərbaycan İcması ABŞ Prezidenti Donald Trampın iştirakı ilə 2025-ci il avqustun 8-də Vaşinqtonda keçirilən tarixi zirvə görüşündən sonra Azərbaycan-Ermənistan normallaşma prosesində müşahidə olunan müsbət dinamikaya, Azərbaycan və Ermənistan liderlərinin bu günlərdə Əbu-Dabidəki görüşün ruhuna zidd olaraq, Ermənistanda və ondan kənarda sülhə qarşı yönələn bir sıra cəhdlərlə bağlı narahatlığını ifadə edir”.

Bu fikir Qərbi Azərbaycan İcmasının yaydığı bəyanatda yer alıb.

Qeyd olunub ki, Ermənistanda məhkəmənin Samvel Şahramanyan adlı şəxsin qondarma qurumun “özünü buraxması barədə qərarı”nın güc tətbiqi və ya təhdid altında verilməsi və buna görə də hüquqi qüvvəyə malik olmaması barədə təxribatçı qərarı hiddətlə qarşılanır.

Bildirilib ki, bu məhkəmə qərarı açıq-aşkar Azərbaycanın suverenliyinə və ərazi bütövlüyünə qarşı yönəlib.

“Ermənistan məhkəməsi hansı əsasla, hansı mandatla suveren bir dövlətin daxili işlərinə qarışır?

Qərbi Azərbaycan İcması bu məhkəmə qərarını, həm də bu il parlament seçkilərinin keçiriləcəyi Ermənistanda revanşistlərin sülhə qarşı fəaliyyəti kimi qiymətləndirir.

Əgər Ermənistan məhkəməsi iki xalq arasında sülhə, barışığa töhfə vermək əzmindədirsə, onda biz qərbi azərbaycanlıların öz dədə-baba yurdlarından deportasiya olunmasını, qəbiristanlıqların, məscidlərin dağıdılmasını pisləyən məhkəmə qərarları çıxarmalıdır”, – deyə bəyanatda vurğulanır.