Qərbi Azərbaycan İcması Ermənistan hökumətini danışıqlara çağırıb

Ermənistanın Baş naziri Nikol Paşinyan 1988-ci il fevralın 20-də Azərbaycanın Xankəndi şəhərində təşkil olunmuş nümayişlərin 35-ci ildönümü ilə bağlı bəyanat verib.

Mitinqlərin guya kortəbii şəkildə təşkil olunduğunu iddia edən N.Paşinyan onu insan haqlarına aid məsələ kimi qələmə verməyə çalışıb. Əslində, həmin nümayişlər xeyli əvvəlcədən hazırlanmış olmaqla, Azərbaycana qarşı ərazi iddiasına və azərbaycanlılara qarşı irqi ayrı-seçkiliyə xidmət edən sistemli bir qəsdin tərkib hissəsi idi.

Bu barədə Qərbi Azərbaycan İcmasının yaydığı bəyanatda bildirilib. Qərbi Azərbaycan İcması Ermənistan hökumətini öz ərazisindən qovduğu azərbaycanlıların sülh yolu ilə, təhlükəsiz şəraitdə və ləyaqətlə öz yurdlarına qayıda bilmələri üçün müvafiq beynəlxalq proses çərçivəsində İcma ilə dərhal danışıqlara başlamağa çağırır.