Qərbi Azərbaycan İcması ölkəmizin əleyhinə səsləndirilən ittihamlarla bağlı bəyanat yaydı

“Amerika Birləşmiş Ştatları Konqresinin Azərbaycan Respublikasının beynəlxalq səviyyədə tanınmış ərazi bütövlüyünə hörmətsizlik göstərməsi və ölkəmizin suveren hüquqlarını təhrif etməsi qəbuledilməzdir”.

Qərbi Azərbaycan İcmasının ABŞ Konqresinin Tom Lantos İnsan Hüquqları Komissiyasında keçirilən dinləmələrlə bağlı bəyanatında belə deyilir.

Komissiyada sentyabrın 19-da “Dağlıq Qarabağın süqutundan sonra Azərbaycanda insan hüquqları” mövzusunda keçirilən dinləmələrdən dərin narahatlığını ifadə edən bəyanat müəllifləri tədbir zamanı Azərbaycan əleyhinə səsləndirilən ittihamların ölkəmizin ərazi bütövlüyü və suverenliyinə hörmətsizliyin, azərbaycanlılara qarşı ayrı-seçkiliyin növbəti təzahürü olduğunu vurğulayıblar.

“ABŞ tərəfinin keçmiş qanunsuz rejimin nümayəndələrinə viza verməsi və onların tədbirdə iştirakına şərait yaratması bu ölkənin separatçılığa dəstəyinin göstəricisidir.

Bundan əlavə, bu kimi dinləmələrin keçirildiyi qanunvericilik orqanının guya müstəqil olması və onların hökumətin siyasətini əks etdirməməsi barədə bəhanələrlə bağlı bildiririk ki, Konqresin sözügedən addımlarının məhz ABŞ Administrasiyasının sifarişi ilə həyata keçirildiyi heç kimdə şübhə doğurmur”, – deyə bəyanatda qeyd olunub.

Bəyanat müəllifləri həmçinin dinləmələr zamanı məsələlərin dini çərçivədə təqdim edilməsinin də təəssüf doğurduğunu bildiriblər.

“Biz Qərbi Azərbaycan İcması olaraq ABŞ Konqresindən bu cür ayrı-seçkili və təxribatçı yanaşmadan əl çəkməyi tələb edirik. Bu mövqe azərbaycanlıların insan hüquqlarını pozur, dini və etnik qarşıdurmanı alovlandırır, sülh prosesinə mane olur və Azərbaycanın ərazi bütövlüyünə hörmətsizlik göstərməklə beynəlxalq hüququ tapdalayır”, – icmanın bəyanatında vurğulanıb.

Bəyanat müəllifləri ABŞ Konqresini azərbaycanlıların Ermənistana geri qayıtmaq hüquqlarını dəstəkləməyə, regionda ədalətli və davamlı sülhün bərqərar olmasına mane olmamağa çağırıblar.