Qərbi Azərbaycan İcması Polşadan dünyaya səsləndi | Bunlara biganə qalmayın!

Polşanın paytaxtı Varşava şəhərində “Mədəni yaddaşımızda Qərbi Azərbaycan” adlı fotosərgi keçirilib.

Tərdbirdə Qərbi Azərbaycanın tarixi, azərbaycanlıların etnik təmizləməyə məruz qalmaları və mədəni irsinin məhv edilməsi haqqında ətraflı məlumat verilib.

İcmanın sədr müavini, deputat Qaya Məmmədov mədəni irsin ümumbəşəri dəyər olduğunu qeyd edərək indiki Ermənistan ərazisindəki Azərbaycan mədəni irsinin məhv edilməsinə dünya ictimaiyyətinin biganə qalmamalı olduğunu vurğulayıb.

Sədr müavini dünya dövlətlərini sülh, barışıq və ədalətə xidmət edən bu haqq işinə, eləcə də Qərbi Azərbaycan mədəni irsinin bərpası və qorunmasına dəstək verməyə çağırıb.

Sərgidə Qərbi Azərbaycanın zəngin irsini əks etdirən şəkillər, o cümlədən tarixi sənədlərin surətləri, Qərbi Azərbaycanın məşhur mədəniyyət xadimlərinin fotoları və yaradıcılıq nümunələrinin təsvirləri, deportasiya səhnələri və dağıdılmış abidələrin fotoşəkilləri nümayiş olunur.

Sərgi aprelin 28-dək davam edəcək.