Qərbi azərbaycanlılara kompensasiya verilməsi barədə iddialara deputatdan reaksiya

“Guya Ermənistan Qərbi azərbaycanlılara kompensasiya ödəyib. Ermənistan xarici işlər nazirinin bu açıqlaması həm həqiqətin, həm də rəqəmlərin təhrifidir. Birincisi, Ararat Mirzoyanın dediyi kimi, 175 min deyil, 300 min azərbaycanlı etnik təmizləmə siyasətinə məruz qalıb”.

Bunu deputat Hikmət Məmmədov parlamentin yaz sessiyasının ilk plenar iclasında çıxışı zamanı deyib.

O bildirib ki, kompensasiya azərbaycanlıların evləri üçün yox, həmin illərdə baş vermiş zəlzələyə görə verilib:

“Çünki 1988-ci il dekabr ayının 7-də Spitak şəhərində zəlzələ baş verdi. 1988-ci ildə müstəqil Ermənistan Respublikası yox idi. Həmin vaxt zəlzələ baş verən ərazidə yaşayan azərbaycanlılara evlərinin təmir edilməsi üçün SSRİ büdcəsindən müəyyən kompensasiyalar verildi. Amma o ödənilən kompensasiya vasitəsilə mənzillər təmir edildikdən sonra həmin evlər ermənilər tərəfindən yenidən mənimsənildi”.