Qərblə İrəvan arasında gizli sövdələşmə var? | Ekspertdən mühüm açıqlama
Son vaxtlar Nikol Paşinyan hakimiyyətinin ABŞ-dən aldığı hərbi-siyasi dəstəyi gücləndirmək üçün köhnə sovet raketləri, döyüş sursatlarını Ukrayna Silahlı Qüvvələrinə yardım məqsədilə ötürdüyünə dair mediada xeyli iddialar dolaşır.
Bu iddiaları müəyyən faktlar da qüvvətləndirir. Belə ki, Rusiya Fövqəladə Hallar Nazirliyi öz “Telegram” kanalında Ukrayna Silahlı Qüvvələrinin Kurska zərbələr endirməsində istifadə etdiyi sursatları əks etdirən videogörüntü yayıb.
Nazirliyin minatəmizləmə qrupunun komandiri ərazidən “Toçka-U” raketinin fraqmentlərinin aşkar olunduğu barədə məlumat verib.
Rusiyanın analitik saytlarında verilən məlumatlarda iddia olunur ki, Ukraynada çox sayda köhnəlmiş “S-125” hava hücumundan müdafiə sistemləri və “Toçka-U” raket sistemlərinin peyda olması Ermənistanın bu silahları Kiyevə ötürməsinin nəticəsidir.
Siyasi şərhçi Oqtay Qasımovun sözlərinə görə, Ermənistan faktiki olaraq savaşlar dönəmində tranzit ölkə rolunu oynamaqdadır:
“Bu yalnız Ukraynaya aid deyil. Məlum olduğu kimi, Ermənistan özündə olan silah-sursatı vaxtilə həm İrana, həm də Yaxın və Orta Şərqdəki müəyyən ölkələrə də göndərmişdir”.
Hazırda Ukraynanın bu silahlardan Kursk istiqamətində geniş istifadə etdiyi bildirilir. Kiyevin belə silahları keçmiş Sovet Respublikalarından birindən alması ehtimalı çox yüksəkdir. Beləliklə, KTMT-dən çıxmağa həvəsli, Amerika hərbçilərini isə regiona gətirməyə maraqlı olan Ermənistanın kollektiv Qərblə isti münasibətləri qaynar ocaqların mövcud arealını daha da genişləndirməyə xidmət edir.
![icon](/images/loading.png)