"Azərbaycan hərbi baxımdan həmişə Ermənistanı üstələyib" | Ruben Rubinyan - Baku TV

1998-ci ildən başlayaraq Azərbaycan həmişə hərbi baxımdan Ermənistandan üstün olub.

Bunu Ermənistan parlamenti sədrinin müavini Ruben Rubinyan 44 günlük müharibənin səbəblərindən danışarkən deyib.

“1998-ci ildə Ermənistan və Azərbaycanın hərbi büdcələrinin nisbəti 1-1,1 idi, yəni demək olar ki, tam bərabər, 2008-ci ildə isə Robert Köçəryan prezidentlik müddətini bitirərkən nisbət 1-5,3 olmuşdu, yəni Azərbaycanın hərbi büdcəsi Ermənistanın hərbi büdcəsindən 5,3 dəfə çox idi. Serj Sarkisyan dövründə fərq daha da artmışdı”, – o bildirib.

R.Rubinyan S.Sarkisyanın hakimiyyəti dövründə Qarabağa dair danışıqların dalana dirəndiyini də söyləyib:

“Danışıqlar prosesinin çıxılmaz vəziyyətdə olduğunu sübut etmək üçün o zaman danışıqlar sənədlərini yayımlamağa ehtiyac yox idi. Serj Sarkisyan 2018-ci il aprelin 17-də baş nazir seçildikdən sonra bəyan etmişdi ki, danışıqlar prosesi dayandırılıb, ümid yoxdur”.

Həmçinin vitse-spiker Qarabağın həmişə Azərbaycanın ərazisi olaraq tanındığını qeyd edib:

“Danışıqlara dair bütün sənədlərdə aydın şəkildə Qarabağla əlaqədar nə olacağı aydın şəkildə deyilirdi. Aydın deyilsə, mən deyim: o vaxt hamı Qarabağı Azərbaycanın tərkib hissəsi kimi tanıyırdı”.