"Netflix"in anti-Azərbaycan filmi: Cəmil Həsənlini dəvət etdilər ki…

Qərbin anti-Azərbaycan siyasəti səngimək bilmir. Erməni lobbisinin təsiri altında olan bir sıra dairələr rəsmi Bakının Cənubi Qafqazdakı mövqeyi ilə barışmaq istəmir.

“Report”un araşdırma qrupunun əldə etdiyi eksklüziv məlumat nəticəsində məlum olub ki, qərb Azərbaycanın müasir dövr tarixi ilə bağlı qərəzlərlə dolu bir film ərsəyə gətirməyə hazırlaşır.

Məlumata görə, Böyük Britaniyalı yazıçı Devid Qreysin müəllifi olduğu “Cəzasız olan cinayət” beynəlxalq bədii layihə hazırlanır. Bu layihədə Rusiya İmperiyasının, Sovet İttifaqının və Rusiya Federasiyasının postsovet məkanında yaşayan xalqlara qarşı törətdiyi cinayətlərin “Netflix” video platformasında yayımlanması nəzərdə tutulub.

Filmin mövzusuna nəzər yetirdikdə adi bir tarixi film kimi görünsə də, ekran əsərində sovet dövründə Azərbaycanda hakimiyyətdə olan şəxslər və indiki hakimiyyət barəsində mənfi və qərəzli informasiyaların verilməsi nəzərdə tutulur.

Layihəyə məsləhətçi kimi “Milli Şura” adlanan qurumun sədri Cəmil Həsənli dəvət olunub. Azərbaycanla bağlı qərəzli mövqedən çıxış edən şəxsin layihəyə dəvət edilməsi isə ölkəmizə qarşı qərəzli və qeyri-obyektiv yanaşmanın olduğunu bir daha sübut edir.