"Qərbi Azərbaycan" ifadəsi İrəvanı qorxudur

Martın 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşündə Prezident İlham Əliyevin çıxışına istinadən Ermənistan Xarici İşlər Nazirliyinin növbəti dəfə yalan və iftira dolu bəyanatı bu ölkənin 30 ilə yaxın bir dövrdə həyata keçirdiyi işğal siyasətini, habelə hazırkı postmünaqişə dövründə Azərbaycana və azərbaycanlılara qarşı törətdiyi və gələcəkdə törədə biləcəyi təxribatları ört-basdır etmək məqsədi daşıyır.

Bu barədə XİN-in yaydığı məlumatda bildirilib. Qeyd edilib ki, Ermənistan ərazisindən azərbaycanlı əhaliyə qarşı etnik təmizləmə siyasəti həyata keçirilməsi faktlarının və Qərbi Azərbaycan İcmasının öz doğma torpaqlarına təhlükəsiz və ləyaqətli şəkildə qayıtması tələbinin “ərazi iddiası” və “təcavüzə hazırlıq” kimi qələmə verilməsi tamamilə əsassızdır.

Eyni zamanda qeyd edilib ki, Azərbaycan öz ərazisində yaşayan erməni sakinlərin reinteqrasiyası istiqamətində artıq addımlar atmaqdadır. Erməni sakinlərlə dialoq aparılır və xoşniyyətli addım kimi bu çərçivədə növbəti görüşün Bakıda keçirilməsi təklif edilib. Ermənistan tərəfi isə bunun əksinə, Qərbi Azərbaycan İcmasının dialoq təklifini tamamilə rədd edib. Bu isə Ermənistanın bölgədə sülh və sabitlikdə maraqlı olmamasının, ikiüzlü siyasət aparmasının göstəricisidir. Azərbaycan Ermənistanın hər bir təxribatına qarşı beynəlxalq hüquq çərçivəsində bütün zəruri addımları atacaq.