Rəsmi Moskvadan Paşinyana sərt cavab

“Ermənistan Qarabağı Azərbaycanın ərazisi kimi tanıyıb. İndi Ermənistanın Rusiyanın səylərini görməzliyə vurması yersizdir”.

Bunu Rusiya Xarici İşlər Nazirliyinin sözçüsü Mariya Zaxarova avqustun 2-də keçirdiyi brifinqdə deyib.

O qeyd edib ki, Rusiya regionda Azərbaycan və Ermənistan arasında dayanıqlı sülh və razılaşmaya nail olunması üçün hər şey edir: “Sülhməramlıların mühüm funksiyaları yerinə yetirdiyi hamıya məlumdur. Doğrudanmı, bu fəaliyyət Ermənistan rəhbərliyinə görə gərəksizdir, arzuolunmazdır və onlar sülhməramlıların getməsini istəyirlər? Nikol Paşinyanın açıqlamaları tamamilə anlaşılmazdır”.

Mariya Zaxarova əlavə edib ki, Rusiyanın iştirakı ilə yüksək səviyyələrdə silsilə görüşlər keçirilib və bu mənada Moskvanın fəallığının azalmasından söhbət belə gedə bilməz.

Rusiya Xarici İşlər Nazirliyi Ermənistan və Azərbaycanı sərhədlərin müəyyənləşdirilməsinə çağırıb.