Rusiya və Türkiyə prezidentləri İlham Əliyevi təbrik etdi

“Azərbaycanın müstəqillik əldə etdiyi vaxtdan indiyə qədər keçdiyi yol bizi qürurlandırır”.

Bu barədə Türkiyə Prezidenti Rəcəb Tayyib Ərdoğanın azərbaycanlı həmkarı İlham Əliyevə Müstəqillik Günü münasibətilə ünvanladığı təbrik məktubunda qeyd edilib.

Bildirilib ki, Türkiyə olaraq kədərdə də, sevincdə də bir olduğumuz qardaş Azərbaycanın 2023-cü ilin sentyabr ayında ərazi bütövlüyünü uğurla bərpa etməsindən sonrakı ilk Müstəqillik Günündə duyduğu haqlı qürur və sevincini ürəkdən bölüşürük.

“Azərbaycanın həm regionda, həm də yaxın coğrafiyada nail olduğu irəliləyişlərlə daim fəxr edir və yüksək səviyyəli strateji əlaqələrimizi “Bir millət, iki dövlət” ruhu ilə daha da gücləndirmək istiqamətindəki birgə iradədən böyük məmnunluq hissi keçiririk”, – deyə təbrik məktubunda bildirilib.

Rəcəb Tayyib Ərdoğanla yanaşı, Rusiya Prezidenti Vladimir Putin Azərbaycan liderini təbrik edib. Ölkəmizin milli bayramı – Müstəqillik Günü münasibətilə səmimi təbriklərini çatdıran Rusiya lideri qeyd edib ki, Azərbaycan sosial-iqtisadi inkişaf istiqamətində hamı tərəfindən qəbul edilən uğurlar qazanıb, dünya arenasında layiqli nüfuza malikdir və beynəlxalq gündəlikdəki mühüm məsələlərin həllində fəal iştirak edir.