Rusiya XİN Qarabağla bağlı məlumat yaydı

“Biz Qarabağdakı Rusiya sülhməramlı kontingentinin məsuliyyət zonasında, Ermənistan-Azərbaycan qoşunlarının təmas xəttində, eləcə də rəsmi Bakı ilə İrəvan arasında dialoqda yaranmış mövcud vəziyyətdən ciddi narahatlığımızı bildiririk”.

Bu barədə Rusiya Xarici İşlər Nazirliyinin yaydığı məlumatda qeyd olunub.

“Biz son dərəcə narahatlıqla atəşkəs rejiminin pozulması hallarının və hər iki tərəfdən mütəmadi olaraq itkilərlə nəticələnən müxtəlif insidentlərin artmasını qeyd edirik. 23 aprel hadisələrinin inkişafı kontekstində Rusiya, Azərbaycan və Ermənistan liderlərinin 10 noyabr 2020-ci il tarixli üçtərəfli bəyanatının əsas müddəalarını pozan hər hansı birtərəfli addımların yolverilməzliyini, Laçın yolundan sülh gündəliyinə uyğun olmayan məqsədlər üçün istifadə cəhdlərini xüsusilə qeyd edirik.

Rusiya tərəfi ona yaxın olan Azərbaycana və Ermənistana lazımi yardımı göstərməyə hazırdır. Hesab edirik ki, yaranmış problemlərin bir çoxu aylarla davam edən fəaliyyətsizliyin, Rusiya, Azərbaycan və Ermənistan liderləri arasında imzalanan üçtərəfli sazişlərin əsas istiqamətləri, o cümlədən regionda nəqliyyat kommunikasiyalarının açılması, Ermənistan-Azərbaycan sərhədinin delimitasiyası prosesinə başlanması və Bakı ilə İrəvan arasında sülh müqaviləsinin parametrlərinin razılaşdırılması üzrə danışıqlar prosesində irəliləyişin olmamasının nəticəsidir”, - deyə Rusiya XİN-in məlumatda qeyd olunub.