Şahin İsmayılov Qərbi azərbaycanlıların doğma yurdlarına qayıdış hüququndan danışdı

Qərbi Azərbaycan İcması Cenevrədə keçirilən Birləşmiş Millətlər Təşkilatının “Azlıqların Məsələləri üzrə Forumu”nun 17-ci sessiyasında təmsil olunub.

Tədbirdə çıxış edən İcmanın Nəzarət-Təftiş Komissiyasının sədrinin müavini, Milli Məclisin deputatı Şahin İsmayılov qərbi azərbaycanlıların Ermənistandan qovulduğunu və nəticədə, bu ölkənin tamamilə monoetnik dövlətə çevrildiyini qeyd edib.

Millət vəkili vurğulayıb ki, İcma soydaşlarımızın Ermənistandakı öz dədə-baba yurdlarına təhlükəsiz və ləyaqətli qayıdışının beynəlxalq hüquq çərçivəsində təmin edilməsinə xidmət edən Qayıdış Konsepsiyasını qəbul edib və BMT-nin qərbi azərbaycanlıların qayıdışının və onların hüquq və təhlükəsizliyinin tam şəkildə qorunmasının təmin edilməsində fəal rol oynaması vacibdir.

Şahin İsmayılov qərbi azərbaycanlıların öz dədə-baba yurdlarına qayıdışının təmin edilməsi məsələsinin BMT-nin insan haqları gündəliyində mühüm yer tutmalı olduğunu da vurğulayıb.