Separatçıların mövqelərdən çıxarılmasına başlanılıb

“Qanunsuz erməni silahlı birləşmələrinin mövqelərdən çıxarılma prosesi başlayıb”.

Bu sözləri Prezident İlham Əliyev xalqa müraciətində söyləyib. Dövlət başçısı deyib ki, separatçılar bizim şərtimizi qəbul edərək silahların da təhvil verilməsinə başlayıblar.

“Bu vəziyyətə gətirib çıxarmaq kimə xeyir gətirdi? Axı İkinci Qarabağ müharibəsindən dərhal sonra biz haqlı narahatlığımızı ifadə edərək Ermənistan rəhbərliyinə, onların xaricdəki havadarlarına və digər tərəflərə dəfələrlə müraciət edərək deyirdik ki, Ermənistan Silahlı Qüvvələrinin Azərbaycan ərazisində qalması qanunsuzdur və buna son qoyulmalıdır. Biz deyirdik ki, qanunsuz xunta rejimi öz əski parçasından artıq olmayan “bayraq”larını büküb cibinə qoyub bizim torpağımızdan çıxmalıdır. Bu, bizim suveren hüququmuzdur”, – deyə dövlət başçısı çıxışında bildirib.