Silah istehsalında güclü olan ölkələr sursat tələbatını niyə qarşılaya bilmir? - HƏRBİ XRONİKA

“Hərbi xronika”nın budəfəki buraxılışında müasir müharibələrdə döyüş sursatı təminatının həlledici rolu və aparıcı hərbi sənaye ölkələrinin bu sahədəki istehsal yarışı təhlil olunub.

Bildirilib ki, Ukrayna müharibəsi texnoloji üstünlüklə yanaşı, cəbhənin fasiləsiz artilleriya mərmiləri ilə təmin edilməsinin vacibliyini üzə çıxarıb.

Estoniya kəşfiyyatının hesabatına görə, müharibə iqtisadiyyatına keçən Rusiya 2025-ci ildə istehsalı 17 dəfədən çox artıraraq 7 milyon ədəd iriçaplı sursat hazırlayıb, lakin tələbatı ödəmək üçün İran və Şimali Koreyadan da milyonlarla mərmi almalı olub.

Qeyd olunub ki, Qərb ölkələri də ehtiyatları bərpa etmək üçün istehsal güclərini genişləndirir. NATO-nun Avropa üzvləri 155 millimetrlik mərmi istehsalını 2025-ci ildə 1,6–1,8 milyona çatdırıb və 2030-cu ildə 3,5 milyonu keçməyi planlaşdırır.

ABŞ isə metal gövdə çatışmazlığı səbəbindən aylıq 100 min mərmi hədəfindən geri qalaraq 36 min ədəd istehsal edə bilib. Eyni zamanda Cənubi Koreya və Hindistan qlobal sursat bazarında mövqelərini gücləndirir, Çin isə geniş sənaye potensialına rəğmən faktiki göstəriciləri gizli saxlayır.

Vurğulanıb ki, bu proseslər fonunda Azərbaycan da yerli müdafiə sənayesini inkişaf etdirir. “Azroksan” şirkəti ölkədə “AZ-122”, “AZ-230” və “AZG-300” reaktiv raket sursatlarının yığılmasına və istehsalına başlayıb, Türkiyənin “ROKETSAN” şirkəti ilə birgə “TEBER” aviasiya bombası idarəetmə dəstlərinin yerli istehsalı da gündəmdədir.