Sosial Tədqiqatlar Mərkəzi əhali arasında növbəti sorğuları keçirdi

Sosial Tədqiqatlar Mərkəzinin Azərbaycan və Ermənistan arasında sülh müqaviləsinə ictimaiyyətin münasibətini öyrənmək məqsədilə keçirdiyi rəy sorğusunda respondentlərin 78.2%-i sülh prosesini dəstəklədiyini ifadə edib.

“Azərbaycan və Ermənistan arasında sülh müqaviləsinin imzalanmasını dəstəkləyirsinizmi?” sualına sorğu iştirakçılarının 78.2 %-i “bəli, dəstəkləyirəm”, 19.5 %-i “xeyr, dəstəkləmirəm” cavabını verib. 2.3 % isə cavab verməkdə çətinlik çəkib.

Ermənistanın Azərbaycanı beynəlxalq ictimai rəydə təcavüzkar kimi təqdim etmə cəhdlərinə baxmayaraq, keçirilmiş sorğular göstərir ki, Azərbaycan ictimaiyyətinin sülh müqaviləsinə münasibətində dövri olaraq artan müsbət dinamika mövcuddur.

Həmçinin ötən sorğulara əsasən, ölkə ictimaiyyəti sülh razılaşması ilə bağlı müzakirələrin məhz birbaşa, yəni ikitərəfli formatda aparılmasını məqsədəuyğun hesab edir. Respondentlər arasında yaş artdıqca sülh müqaviləsinə müsbət münasibət bəsləyənlərin sırasında artım müşahidə olunur. Ali təhsillilər arasında müsbət mövqeyə malik olanlar orta təhsillilərlə müqayisədə üstünlük təşkil edir.

Qeyd edək ki, sorğular 2024-cü ilin 15-19 fevral tarixlərində 18 yaşından yuxarı 390 respondent arasında kompüter dəstəkli telefonla müsahibə formatında keçirilib. Sorğu iştirakçıları seçmə ehtimallı üsulla ölkə üzrə əhalinin paylanmasına proporsional müəyyən edilib və gender balansı qorunub.