Starmer Zelenski ilə görüş zamanı Trampla bağlı nə dedi? | Avropa Ukrayna üçün hərəkətə keçdi

Martın 2-də Londonda Ukrayna məsələsinə həsr olunmuş sammit Prezident Volodimir Zelenskinin ABŞ Prezidenti Donald Trampla yaşadığı gərginlik fonunda baş tutub.

Sammitin sonunda Böyük Britaniya, Fransa və Ukrayna ABŞ-yə təqdim etmək üçün sülh planı üzərində birgə işləməyi planlaşdırdıqlarını açıqlayıb. Bu planın məqsədi Ukraynanın danışıqlarda mövqeyini gücləndirmək və Rusiyanın mümkün təcavüzünün qarşısını almaq üçün koalisiya yaratmaqdır.

Qeyd edək ki, London görüşü Ukraynanın Qərb müttəfiqləri ilə əlaqələrini gücləndirmək məqsədi daşısa da, bəzi məqamlar Ukrayna üçün heç də ürəkaçan görünmür.

Bunu tərəflərin mətbuatda yayılan fikirləri daha da qüvvətləndirir. Belə ki “Financial Times”ın bildirdiyinə görə, görüş zamanı Kir Starmer V.Zelenskiyə D.Trampla münasibətləri düzəltməli olduğunu, əks təqdirdə sülhün qalıcı olmayacağını söyləyib.

Ukraynalı lider isə sammitdən sonra Ağ Evdə baş verən mübahisənin nəticələrinin aradan qaldırılacağına və Kiyevlə Vaşinqtonun konstruktiv münasibətlərə qayıdacağına əminliyini ifadə edib.

Böyük çoxluğun ümidlər bəslədiyi London sammiti gözlənilən nəticəyə varmadı ki, V.Zelenski başda olmaqla görüşün iştirakçıları yenə ümidi ABŞ-də axtarmağa başlayıblar?