Sülhməramlıların əmanətə xəyanəti

Azərbaycan ərazilərində müvvəqqəti yerləşdirilən Rusiya Sülməramlı Kontingenti fəaliyyətə başladığı ilk gündən müxtəlif təxribatlara göz yumub, silahlı erməni separatçılarının Qarabağı tərk etməsi üçün barmağını belə tərpətməyib. Bununla da üçtərəfli bəyanatın müddəalarını pozan sülhməramlılar bölgədə qanunsuz silahlı dəstələrin formalaşmasına rəvac verib.

Üstəlik, bu azmış kimi, həmin dəstələrə silah-sursat çatdırılmasına şərait yaradır. Xankəndi-Xəlfəli-Turşsu torpaq yolunu hərbi daşımalar dəhlizinə çevirən rusiyalı sülhməramlıların növbəti belə canfəşanlığı martın 24-də Azərbaycan Müdafiə Nazirliyi tərəfindən qeydə alınıb. Bu dəfə də sülhməramlılara məxsus zirehli maşının ermənilərə aid hərbi yük maşınlarına bələdçilik etdiyi görünür.

Bundan ürəklənən separatçılar mühəndis və xüsusi texnikanın köməyi ilə yeni Xankəndi-Kosalar-Mirzələr-Turşsu yolunu çəkməyə başlayıblar. Rəsmi Bakı bu bələdçiliyin öz öhdəliklərinə uyğun gəlmədiyini sülhməramlı kontingentə dəfələrlə xatırlatmasına baxmayaraq, hələ ki nəticəsini görmüş deyilik.

Siyasi ekspertlər isə bu kimi məsuliyyətsiz və tərəfli yanaşmanın növbəti təxribatlara gətirib çıxara biləcəyi qənaətindədirlər.