Şuşa Bəyannaməsinin imzalanmasından iki il ötür
İyunun 15-i Şuşa Bəyannaməsinin imzalanmasından iki il ötür.
2021-ci ilin eyni günündə Azərbaycan və Türkiyə prezidentlərinin tarixi imzası ilə hər iki ölkənin münasibətləri ən yüksək mərhələyə qədəm qoydu.
Qars müqaviləsindən yüz il sonra iki qardaş ölkə arasında əldə olunan və gələcək perspektivlər üçün önəm kəsb edən müqavilə hərtərəfliliyi ilə həm də bütün dünyaya mesaj verdi.
Rəcəb Tayyib Ərdoğan və İlham Əliyevin Şuşada imzaladıqları tarixi sənəd iki ölkənin maraqlarının qorunması ilə yanaşı, regional və beynəlxalq məsələlərdə də mühüm əhəmiyyət daşıyır. Çünki dünyada güc faktorunun ciddi rol oynadığı zamanda bu müqavilə həm də Bakı və Ankaranın təhlükəsizliyinin zəmanətçisidir.
Bir sözlə, Şuşa Bəyannaməsi Azərbaycan və Türkiyə arasında ən yüksək səviyyədə olan münasibətlərin rəsmi təsdiqidir. Ölkələrimiz arasında imzalanan bu tarixi saziş böyük bir coğrafi məkanda reallaşdırılan siyasətin konturlarını müəyyən edən əsas amillərdən biridir. Əlaqələrin yüksək səviyyədə inkişafı isə təkcə bu dövlətlərin yox, həm də regionun ümumi tərəqqisinə, sabitliyin bərqərar olmasına mühüm töhfədir.