Şuşa Forumunda mühüm müzakirə: dezinformasiya və feyk xəbərlər

Azərbaycanın mədəniyyət paytaxtı Şuşada baş tutan Qlobal Media Forumunun üçüncü günü "Mediada investisiya və istehlak tendensiyaları" adlı sessiyanın davamı ilə başlayıb.

Sessiyada yeni mediada istehlak tendensiyaları və media savadlılığı mövzusuna toxunulub. Tədbirdə yerli və xarici media nümayəndələri, eyni zamanda ekspertlər iştirak edirlər. Sessiyada dezinformasiya və “feyk nyus”la mübarizə üsullarından danışılıb. Media məhsullarının istehsal və istehlakı ilə bağlı dəyişən trendlər, yeni mediada dəyər zəncirinin yaradılması və biznes modellərinin inkişafı ilə bağlı fikir mübadiləsi aparılıb.

Qeyd edək ki, Şuşa Qlobal Media Forumuna 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumu qatılıb. Tədbirdə həmçinin 60 yerli media rəhbəri və nümayəndəsi iştirak edir. Forum işini iyulun 23-də yekunlaşdıracaq.