Terrorçular Paşinyanı hədələyir

Ermənistanın Baş naziri Nikol Paşinyanın Azərbaycanın 86.6 min kvadratkilometrlik ərazisini tanıdığını bəyan etməsi erməni separatçıların planlarını puç edib. Ölkə daxilində Baş nazirə qarşı etirazlar yenidən baş qaldırıb, vəziyyət o həddə çatıb ki, N.Paşinyanın bu açıqlamasından sonra oğlu Aşot Paşinyanı oğurlamağa cəhd ediblər.

Rusiyalı politoloq Sergey Markov mövzu ilə bağlı Baku TV-yə açıqlama verib. Onun sözlərinə görə, separatçılar istədiklərinə nail olmadıqlarına görə buna bənzər hərəkətlər hələ çox davam edəcək.

“Tək Nikol Paşinyanın həll edəcəyi məsələ olsaydı, o, Azərbaycanın ərazi bütövlüyünü çoxdan qəbul edərdi və orada yaşayan erməni icmasını ərazidən çıxarardı. Sadəcə olaraq N.Paşinyan ondan qorxur ki, Ermənistan siyasətində radikallaşma daha amansız nəticələrə gətirib çıxara bilər. Unutmayaq ki, Ermənistanda terror üsullarından istifadə edən radikal millətçilər də var. Nümunə olaraq “Daşnaksütyun”u göstərə bilərik. Bu təşkilat 100 ildən çoxdur terror qruplaşması kimi fəaliyyət göstərir və onlar N.Paşinyanın qərarları ilə razı deyillər, ondan qisas almaq üçün fürsət axtarırılar”, – deyə politoloq qeyd edib.