Türkiyənin Quru Qoşunları komandanı ölkəmizdə bir sıra görüşlər keçirdi

Türkiyənin Quru Qoşunları komandanı Azərbaycanda rəsmi səfərdədir.

Müdafiə Nazirliyinin məlumatına görə, qardaş ölkənin nümayəndə heyəti əvvəlcə Fəxri xiyabanda Azərbaycan xalqının Ümummilli Lideri Heydər Əliyevin və görkəmli oftalmoloq-alim, akademik Zərifə xanım Əliyevanın məzarlarını, həmçinin Şəhidlər xiyabanı və Türk Şəhidliyi abidəsini ziyarət edib.

Daha sonra Ordu generalı Selçuk Bayraktaroğlunun rəhbərlik etdiyi nümayəndə heyətini müdafiə naziri general-polkovnik Zakir Həsənov qəbul edib.

Görüşdə ölkələrimiz arasında bütün sahələrdə olduğu kimi, hərbi sahədə də əməkdaşlığın yüksək səviyyədə olduğu bildirilib. Qardaş ölkələrin dövlət başçılarının dostluq münasibətləri nəticəsində imzalanan Şuşa Bəyannaməsinin icrası ilə bağlı zəruri tədbirlərin həyata keçirilməsinin vacibliyi qeyd olunub.

Səmimi qəbula və göstərilən yüksək qonaqpərvərliyə görə minnətdarlığını bildirən Ordu generalı Selçuk Bayraktaroğlu Azərbaycan-Türkiyə Yüksək Səviyyəli Hərbi Dialoq İclasının iki ordu arasında uyarlılığın təmin edilməsində mühüm əhəmiyyət kəsb etdiyini bildirib.

Görüşdə hərbi, hərbi təhsil sahələrində əməkdaşlığın inkişaf perspektivləri, eləcə də maraq doğuran bir sıra digər məsələlər ətrafında geniş fikir mübadiləsi aparılıb.

Daha sonra müdafiə nazirinin birinci müavini – Ordunun Baş Qərargah rəisi general-polkovnik Kərim Vəliyev qardaş ölkənin nümayəndə heyəti ilə görüşüb.

Ardınca Azərbaycan Respublikasının müdafiə nazirinin müşaviri general-polkovnik Bəxtiyar Ersay ilə görüş keçirilib. Görüşdə Ordumuzun Türkiyə Silahlı Qüvvələri modelinə uyğunlaşdırılması, hərbi qulluqçularının peşəkarlığının daha da artırılması və təcrübə mübadiləsi məqsədilə birgə təlimlərin keçirilməsinin əhəmiyyəti diqqətə çatdırılıb.