Vardanyandan etiraf: separatçıların "lideri" Bakı ilə bağlı açıqlama verdi

Ombudsman Səbinə Əliyeva Azərbaycan-Ermənistan dövlət sərhədinin “Laçın” sərhəd-keçid məntəqəsində saxlanılaraq həbs edilmiş Ruben Vardanyanla görüşüb.

Oktyabrın 3-də keçirilmiş başçəkmə zamanı Ruben Vardanyan fərdi qaydada dinlənilib, müraciətləri yerində cavablandırılıb.

Qanunvericilikdə nəzərdə tutulan qaydada hüquqlarının təmin olunma vəziyyəti monitorinq edilib. Vardanyan saxlanma şəraitindən razılığını bildirib, ilkin tibbi müayinədən keçdiyini və səhhətində heç bir problemi olmadığını qeyd edib. Ailə üzvü ilə telefon danışığı, sovqat qəbulu, kitabxanadan istifadə və informasiyaya çatım imkanları təmin olunub. Eyni zamanda, həbs edilmiş şəxsin istintaq dövründə hüquqlarının müdafiəsi ailəsinin seçdiyi vəkil tərəfindən həyata keçirilir.

Başçəkmə çərçivəsində müəssisədə saxlanma şəraiti – şəxsi gigiyena və sanitariya, tibbi xidmət, qidalanma məsələləri yerində araşdırılıb, saxlanılan şəxslərə münasibətdə də heç bir ayrı-seçkiliyə yol verilmədən hüquqlarının, informasiyaya çatım imkanlarının, lazımi tibbi-psixoloji xidmətin təmin olunduğu müəyyən edilib.