Xankəndini tərk edən müəllimdən absurd yanaşma

Əvvəllər Xankəndidə yaşayan, hazırda isə İrəvanda məskunlaşan erməniəsilli müəllim Nina Şahverdiyan Ermənistanın “RADİOVAN” radiosunda erməniləri açıq-aşkar yeni müharibəyə çağırıb.

Diktorun hansı halda Qarabağa qayıdacağı ilə bağlı sualını cavablandıran qadın “bunun üçün yeni müharibə olmalıdır, yəqin ki, 30 ildən sonra, çünki o zaman Ermənistanın güclü ordusu olacaq”, – deyərək cavab verib.

Bu azmış kimi N.Şahverdiyan müharibənin yaxşı bir şey olduğunu da əlavə edib.

Belə başa düşülür ki, Azərbaycanın erməniəsilli sakinlərin reinteqrasiyasına çağırdığı, hətta bu prosesi asanlaşdırmaq üçün reintegration.gov.az saytını istifadəyə verdiyi bir vaxtda ermənilər tamam başqa xəyallar qururlar.

Xatırladaq ki, Nina Şahverdiyan müəllimdir. Yeni nəsil yetişdirməli olan bu qadın müharibənin yaxşı bir şey olduğunu bəyan edirsə və revanşizm haqqında fikirlərə dalırsa, nəticə heç də yaxşı olmayacq. Nifrət hissi ilə yaşamaq bölgədə sülhün dayanaqlı olması üçün yaxşı ssenari vəd etmir.