XİN Paşinyanın iddialarına cavab verib

Xarici İşlər Nazirliyinin mətbuat katibi Ayxan Hacızadə Ermənistanın Baş naziri Nikol Paşinyanın martın 23-də səsləndirdiyi əsassız iddiaları cavablandırıb.

Qurumun sözçüsü bildirib ki, müfəssəl şəkildə cavablandırılmasına baxmayaraq, rəsmi Bakı Ermənistan XİN-in 18 mart tarixli bəyanatını inadkarcasına təkrarlayan N.Paşinyanın bu iddialarını pisləyir və rədd edir. Azərbaycanın ərazi bütövlüyü və suverenliyinə hədə olan və beynəlxalq öhdəlikləri heçə sayan Ermənistan rəhbərliyinin təcavüzkar ritorikası bu ölkənin bölgədə sülhdə maraqlı olmadığını göstərir.

Qeyd edilib ki, Ermənistanın etnik təmizləmə siyasətinin qurbanı olmuş keçmiş məcburi köçkünlərin öz doğma yurdlarına qayıdışının Azərbaycan tərəfindən üçtərəfli bəyanatın pozuntusu kimi qələmə verilməsi qəbuledilməzdir. Eynilə Ermənistan tərəfinin özünü Azərbaycanın erməni sakinlərinin “hüquq müdafiəçisi” kimi təqdim etməyə heç bir mənəvi haqqı yoxdur.

Həm öz ərazisində, həm də 30 illik müddətdə işğal altında saxladığı şəhər və kəndlərdə azərbaycanlılara məxsus mülkləri dağıdan Ermənistanın Azərbaycanın öz suveren ərazilərində və tarixi torpaqlarında məskunlaşma həyata keçirməsinə qarşı çıxması absurddur.

Bu bəyanat həmçinin Ermənistanın dönə-dönə istinad etdiyi Praqa və Soçi razılaşmaları ilə də birbaşa ziddiyyət təşkil edir.